Гэр бүл, хөдөлмөр нийгмийн хамгааллын яам, Хөдөлмөр эрхлэлтийг дэмжих сан болон Дэлхийн банкны санхүүжилтээр жижиг зээл, санхүүгийн дэмжлэг авсан иргэн, аж ахуй нэгж, байгууллагууд үйл ажиллагаагаа тогтворжуулах, хөгжүүлэхэд бизнес инкубацийн үйлчилгээний гүйцэтгэх үүрэг, ач холбогдлын талаар хэлэлцүүлэг өрнүүллээ.

2024 онд Дэлхийн банкны санхүүжилтээр хэрэгжиж буй “Онцгой байдлын үеийн дэмжлэг болон хөдөлмөр эрхлэлтийн төсөл”-ийн хүрээнд 13.8 тэрбум төгрөгийн зээлийг иргэн, аж ахуйн нэгжийн 579 төсөлд олгосон ба энэ онд зээлийн дараах санхүүгийн бус дэмжлэгийг үргэлжлүүлэн үзүүлж байна.

Олон улсад бичил, жижиг бизнесийг бизнес инкубацийн үйлчилгээгээр дэмжин ажилладаг. Манай улсын тухайд энэ чиглэлээр өмнө хэрэгжүүлж байсан хөтөлбөрийг цаг үеийн нөхцөл байдалтай уялдуулан шинэчлэх, санхүүжилтийг тогтвортой байлгахад анхаарах шаардлагатай байгааг хэлэлцүүлэгт оролцогчид хэлж байв.

Мөн өөрсдийн үйл ажиллагааны чиглэлээр мэдлэг, туршлагаа хуваалцан хамтран ажиллахад бэлэн байгаагаа илэрхийллээ.

Хэлэлцүүлэгт Монголын ажил олгогч эздийн нэгдсэн холбоо, Монголын үйлдвэрчний эвлэлийн холбоо, Монголын бизнес инкубаторуудын үндэсний нэгдсэн холбоо, “Старт ап Монголиа” ТББ, “Хөгжлийн шийдэл” ТББ-ын төлөөлөл, Их, дээд сургуулиудын багш нар, Монголын технологийн үндэсний парк, шинжлэх ухааны академийн төлөөллүүд оролцсон.

Цаашдаа Хөдөлмөр эрхлэлтийн үйлчилгээний тухай хуулийн шинэчилсэн найруулгын төслийг мэргэжлийн байгууллагуудаар хэлэлцүүлэх, хуулийн төсөлд бизнес инкубацийн үйлчилгээний талаарх зохицуулалтыг оновчтой тусгах талаар санал нэгдлээ.